Solveig Slettahjell kommer til festivalen på Os i juni.

Vi vet at John Mayall og Bertine Zetlitz kommer til den tiende Osøren Blues & Jazzfestival i slutten av juni, men også flere andre spennede navn som Solveig Slettahjell og unge lovende Fredrik Strand Halland fra Bergen er nå klar.

Osøren Blues & Jazzfestival rundar 10 år i 2008 og markerer jubileumsåret både med å invitera ein av dei største europeiske legendene og inspiratorane innanfor bluesen, sjølvaste John Mayall, og nye spennande spelestader for publikum, mellom anna ein jernbanehall frå den gongen blues høyrde til på andre sidan av Atlanterhavet.

Osøren Blues & Jazzfestival har endeleg blitt tosifra. 10 år har entusiastane stått på, lagt ned tusenvis av dugnadstimar og presentert musikk i nasjonal toppklasse både innanfor blues og jazz. Årets utgåve skil seg ikkje nemneverdig frå dei ni føregåande, men det må vera lov å seia at festivalleiinga med Gunnar Nagell Dahl i spissen har tatt fram stortromma når dei har valt å henta over ein av dei største inspiratorane innanfor denne musikkforma, John Mayall, og hans Bluesbreakers.

- Vi har stort sett alltid halde ein nokså nasjonal profil på festivalen, men synes vi må ha lov til litt ekstra denne gongen, seier Nagell Dahl. Ikkje for det, festivalen har tidlegare kunna by på store namn også frå utlandet, i tillegg til gode og interessante norske utøvarar.

- John Mayall er no likevel toppnamnet så langt i løpet av dei åra som har gått sidan festivalen tok til i 1999, held Nagell Dahl fram og vedgår at han gler seg, han òg.

Men Osøren Blues &Jazzfestival er meir enn ei gammal blueskjempe frå England. Det er barnekonsertar, utstilling og festivalkunstnar, jazz på toppnivå, cruise på fjorden og ei mengd med både kjende og meir ukjende namn. Festivalen har aldri vore redd for å presentera nye og uskrivne blad, grupper som har vore kjende for dei innvigde og grupper som ein har sett har framtida for seg. Det er heller ikkje tvil om at mange har blitt reine publikumsyndlingar og nærast høyrer til under dei knappe tre dagar festivalen går av stabelen i slutten av juni. Det er nok å nemna populære Jolly Jumper & Big Mo og Good Time Charlie, som har fått æra av å dela scenen med John Mayall på fredagskvelden. Vetrhus Bluesband er ein annan gjengangar som er der fordi dei er så umåteleg etterspurde i Os. Å reisa på bluescruise med dei er det nærmaste ein kjem full storm sjølv i stille ver. Hungry John kjem også, det skulle nesten berre mangla i eit jubileumsår. Vi gløymer heller ikkje Twang Gang frå Voss og Fredrik Strand Halland, det unge talentet frå Bergen

- Jazz skal det også vera i jubileumsåret, det er det andre beinet festivalen kviler på, seier Gunnar Nagell Dahl og nemner Trio de Janeiro, latinamerikansk nyting med norske toppmusikarar, Solveig Slettahjell m/band, Bertine Zetlitz og bergensk nestor Dag Arnesen med sin trio. Alt er ikkje heilt spikra enno, legg han til, men nemner at det blir kyrkjejazz med mellom andre Henning Sommerro og naturlegvis blues- og jazzcruise om bord i MS Midthordland mellom anna med jazzveteranane Osøren Jazz Ensemble, også eit naturleg val i eit jubileumsår.

Opninga er ved Bergen ungdomsstorband, så dermed skulle det meste vera tatt med, så langt. Men Gunnar Nagell Dahl har meir på lur:

- Alle som har vore på festivalen, kjenner Fjellheim. Det blir naturlegvis ein av spelestadene, men i år legg vi dei største konsertane til Vognhallen heilt sentralt på Osøyro. Det er ein 70 m lang og 10 m brei jernbanebygning som vart reist i 1890-åra då Os fekk togsamband med Bergen. Vi bruker også Oselvarnaustet på andre sida av elva, i tillegg til Peppes og Kaien. Vi samlar med andre ord fleire aktivitetar nede på sjølve Osøyro, seier han og er ikkje redd for at dårleg ver skal piska regnet inn i den halvopne hallen.

- Festivalen har eit godt forhold til høgre makter, så veret har alltid vore på vår side, og skulle vi koma på kant med kvarandre, har vi råd for det også, smiler han.